АВАР КИЦАБИ ВА АБИЯЛ

· Абизе бегьулебани, мунгияли добго жо бугоан.

· Абизе дуда тIадаб буго, тIубай-тIубангутIи ханасул иш буго.

· АбизегIан рагIи – дур лагъ, абун хадуб – мун гьелъул лагъ.

· АбичIого тараб рагIи – хазина.

· Абундачал гIемер, ячундачал дагь, Ячунев чи гьечIей Чалла Бариян.

· Абундачалда хадуй лъугьарай хабалъ ракьа турарай цо гIаданалъул хабаде ккарайила.

· Абунщинай ясги кьоларей, кьунщинаб рагIиги батулареб.

· Агьлулъун гьечIев чи бетIерлъунги тоге, гьунар гьечIеб чу рекIун, чабхъадги унге.

· АгIаги махIаги гьечIого, дахIа бижулареб (ракги лъимги гьечIого, тIегь бижулареб).

· Адаб буголъи – тарбия буголъи.

· Адаб гьечIесул адабги ккоге, жаниб лъоларесда рагIиги бицунге.

· Адаб, гьумер бихьун гуребила, чи вихьунила гьабизе кколеб.

· Адабазул эбел – калам дагьайила, хьулазул эбел – сабруйила.

· Азарго галул нух цо галудасан байбихьулеб.

· Азаргояс гьабураб цояс биххулеб.

· Азарго оц бугев цо релълъмаххалде ккаравила.

· Арав вачIунгеги, лъутарав ворчIугеги.

· Аралда нилъеца туманкI речIчIани, бачIунеселъ нилъеда гIарада речIчIулеб.

· Аралда хадуб ракIги хогейила, гIакълуялъ къабул гьабулареб жоялдаги божугейила.

· Бакъ аги, къо аги, къоабилелъ харж щваги.

· Бакъ агиян – къулун, къо агиян – ворхун.

· Бакъ баккани – моцI тIагIунеб, моцI баккани - цIваби тIагIунел.

· Бакъ баккигун, моцI тIерхьине ккола.

· Бакъ бокьарал – ракьанда, рокьи ккарал – рагIалда.

· Бакъ бухIуларелъуб ракь хинлъулареб.

· Бакъ гьечIони, моцIги гвангъулеб.

· Бакъ лъугьунареб рокъове тохтир лъугьунев.

· Бакъ-моцI тIерхьараб мехалъ, цIваби раккулел.

· Бакъ тIерхьунелъул, рагьдул кIалтIа гIодор чIоларел.

· Бакъ тIерхьун хадуб рукъ лъухьулареб.

· Бакъ щолареб бакIалда хIучч цIай.

· Бакъан лъикIаб буго, цIалулеб жо къуръан батани.

· Бакъан лъикIаб бугоан, цIалулеб жо къулгьу батичIони.

· Бакъараб гьой гIадинан кваналелъул хъантIуге.

· Бакъараб гьойца гьусун бацI кквеларо.

· Бакъараб гIанкIуялда макьилъ муч бихьулебила.

· Бакъалда хинлъун букIунеблъи лъидаго лъалеб.

· Бакъараб хъумур гIадав, хъантIараб гьой гIадинав.

· Бараб ахIулъги ахIараб болъгийила бихьинчи лъалев.

· Бараб лълъар борхуларес ккараб къоги борхулареб.

· Баракат гьечIеб даранги девлет гьечIеб ригьинги.

· Баракат лъуни, цоги гIемераб, лъечIони, нусгоги дагьаб.

· Барахщарасул боцIи сахаватас кваналеб.

· Барахщарасул къайи къавул гьойца кваналебила.

· Барахщарасул – чияе, чехь квешасул – жиндиего.

· Баргъичал рокьила – мун вокьиларо, кьураб жо босила – мун восиларо.

· Баркала гьечIеб кечI – кири гьечIеб лаила.

· Баркала кисиниб лъоларо.

· Баркат гьечIеб боцIудасаги цIунаги, гьуинлъи гьечIеб ригьнадасаги цIунаги.

· Баркат гьечIеб боцIиялдасан баркат бахунареб.

· Баркиялъеги зигараялъеги кватIи букIунаребила.

· Бартигун xIyp чIикIи лъикI, хIамагун кIалцIи квинегIан.

· Бокьани чулъун кьололевила чIужуялъ рос, бокьани хIамалъун хIалтIизавулевила чIужуялъ рос.

· Бокьанщинаб лъиейила щвараб, мурадалде щун, щивила хварав.

· Бокьараб гурони, рагIуларебила.

· Бокьараб кьуру биххизе кIолебила рагIуда.

· Бокьараб щвечIони, щваралда ракI рази гьабе.

· Бокьарабщинаб гьабуни, бокьуларебщинаб тIаде бачIунеб.

· Бокьарас гьетIун бице, бокьарас битIун бице, амма битIараб бице.

· Бокьизеяли гIемер жо бокьила, амма гIорхъиги лъазе ккола.

· Бокьоб гIачIар гIадинан, гIергIедулев вукIунев, ГIиялъ цIцIелжо кинигин, э-эдулев вукIунев.

· Бокьобе гьечIеб гIи къватIибе бачIунареб.

· Бокьоса къватIиве вачIун, къориниве лъугьунге.

· Бокьулареб жоялъе инсан гIинкъавги вукIуневила, беццавги вукIуневила.

· Бокьуларого гьабулеб хIалтIи гIазабила, бокьун гьабулеб хIалтIи рохелила.

· Вай, дур кIалзул бахьинлъи! Вай, дур махьил чIегIерлъи!

· Вай, нижер бахIарай, нижер бахIарай,

ЧахтIида гурони гъалги бихьичIей.

Вай, нижер бахIарай, нижер бахIарай,

Гурдида гурони черхги бихьичIей.

· ВакъанагIан бикъула, гIорцIанагIан хъантIула

· Вакъанани гIодун, гIорцIани кьурдун,

ГIадамасул гIамал – манзил къокъаб жо,

· Буголъи баккарун, гьечIолъи бахчун,

Чангияс хIехьечIеб байтулман боцIи.

· Вакъани къадиясги бикъулеб.

· Вакъарав вехьасда гирун бачIунеб гьорчо чедилан кколебила.

· Вакъарав квен гьабизеги виччаге, кванарав цIа бакизеги виччаге.

· Вакъарав къулун лъалев, гIорцIарав ворхун лъалев.

· Вакъаравги валагьун, муъминчи кваналарев.

· Вакъарасда кколебила жив киданиги гIорцIиларилан, гIорцIарасда кколебила жив кидаго вакъиларилан.

· Вакъарасе къо лъагIелгIан халатаб.

· Вакъарасе мочол чедги гьуинаб, къечарасе хIорил лъимги татуяб.

· Вакъарасул лъорове вугьарав лъугьаравила.

· Вакъи хIехьоларес гIорцIиги хIехьоларебила.

· Вакъидал гIодулев, гIорцIидал велъулев.

· Вакъидал ханги хIинкъулевила, хIинкъидал бацIги лъутулебила.

· ГодекIанив цIакъав гIалхуда вагъуларев.

· Гозо сверичIеб жоялъ гьан кунареб.

· ГорботIа рокьо гурев, рукьал гIа цедер гурев.

· Гордал рагьиларилан чIарас нуцIа рагьизе кколеб.

· Гордухъан бачIараб гордухьан унеб.

· Горил рагIал гьечIеб, рагIул ахир гьечIеб.

· Горо чIахIиял жалила лъимал.

· ГохIда гьабун, xIop чIолареб, кьан хIамил рачI букIунареб.

· ГудратIа мохмох гурони, чIобого кьолеб жо букIунареб.

· ГудратIа тIагIи гIункIкI гIорцIизе гуребила балеб, гIункIкI кквезейила.

· ГудратIе ккани, гъалбацIги кколебила.

· Гулла-ххер гьечIони, чан щоларо.

· Гуллица цояв чIвала, мацIалъ нусгояв чIвала. ГунащмагIна гьабуге, битIаралъе нух биччай.

· Гьекъараб муслъаги, кванараб хIалаллъаги.

· Гьекъарав чигун гаргадизегIан горбоца гIypy бухъиго льикIаб.

· Гьекъедал вагъулев, вигьиндал вахчулев.

· Гьекъедал – хIелеко, вигьиндал – гIанкIу.

· Гьекъезе лъан, гьекъе, кваназе лъан, кванай.

· Гьекъел босулев чи – гIакълу бичулев чи.

· Гьекъел босулев чи – питна босулев чи.

· ГьекъечIого мехтарав мехтичIого вигьунев.

· Гьекъолдухъан хъизаналъе тушманав, гьерсихъан киназего тушманав.

· Гьекъолдухъанасда гьекъолдухъан, тIаргъил щомериялъухъ валагьун, лъалев.

· ГIащтIи хвезе ноцI гIадав, цIан гьечIеб чурпа гIадав.

· ГIашура къваридаб, къурбан гIатIидаб.

· ГIебуда зар баге, зазида xIeтIe чIоге.

· ГIебуялдаса бегIераб жо – гIолохъанчиясул ракI, мохмохидаса кьарияб жо – мегIер.

· ГIебуялъ гIебу борлъулареб.

· ГIедал течIони, хведал толебила.

· ГIедал щарги чIвалеб, ккедал (щведал) чиги чIвалев.

· ГIедал яс раса-цIалкIугум ягъулей.

· ГIедал яс росасе кье: яс йиго цIорол цIарагI.

· ГIедал ясалъе рос щваги, бокъиндал лалие гьури бачIаги.

· Дие хъвалеб чагьана, чахъабазе бачунеб наку.

· Дие щиб, кин кканиги! – ян абурабила гъоркьа палугьанас.

· Диего гIоло абулеб батани, чехь бихъаги, амма гьирда къвачIа рекьараб бугилан абурабила гIонкIкIоца.

· Дикьа къолей рокъой йигилан, къватIив къурас чIужу юхарайила.

· Дир аниб кванан, чияр доба къинлъун.

· Дир бадисан ялагьун, дир кIалдисан кIалъан.

· Дир бикъаги, дица бикъугеги.

· Дир вас гIезегIанищила рагъ ккезе чIун букIараб.

· Добасан цIулакьо бегьичIони, анисан мохмохалги регьуларел.

· Добго гьороб добго гьури (гьерсихъанасде).

· Дове цадахъ босун уневги вихьичIила, добе щвезабизе уневги вихьичIила.

· Долого бекьараб хуралдаса квер босе.

· Доморун вега, долого вахъа.

· ДугIаялдаса богIол хуралъе ракго рекъолебила.

· Дуда paгIa, дида бихьа.

· Дуда хIама батила мучIдузда гогьдарулеб, кIкIалахъ гъалбацI бихьила гьекъезе лъим щолареб.

· Дуцаго бекьана, дуцаго лъилъе.

· Дуцаго бухъаралъуве мунго кколев.

· Дуцаго веццуге, чияца веццизегIан чIа.

· Дуцаго гьабичIони, дур ургъел цогидазги гьабулареб.

· Дуцаго дудаго зинкIкIе, чияда зинкIкIани кин букIунебали лъазе.

· Дуцаго нахъе бацIцIине кколеб жо туге.

· Дуцаго цIетIе рехичIел хинкIал хIарччиниса ралагьуге.

· Дуцаго чед тIохьтIол кун, чияе ролъул кье.

· Жал бурияб бацI лъугьинчIев, льлъар хечаб оц лъугьинчIев.

· Жалаца кквечIев рачIалъ кколаро.

· Жалго гьоболасе гьабигIан квешал – гьоболлъухь гурони, сордо баларел.

· Жалго гIезегIан лъималазе бищунго херал чагIи рокьулел, кIудиял гIейгун бищунго херал чагIи рихунел.

· Жаниб тани – турулел, течIого бицани – сурулел.

· Жанибе нударичIо, къватIибе бадаричIо, дица лъимал кин хьихьилел?

· Жаниб тIагъур гьечIеб тIадгIагъур гIадав, жаниб гъвар-гъвар гьечIеб царгьил тIи гIадав.

· Жанир рукIун – рукъ чIунтарал, рокьор рукIун – хур чIунтарал.

· Жанир херлъаги, хвезе кватIаги.

· Жаниса гьодорав – гьаракь кIудияв.

· Жанисан хIал хъубав гьалмагъ гьусун тIамураб гьоялдасаги квешавила.

· Жинцаго квани, чехь унтулев, чияца квани, мугъ унтулев.

· Жинцаго квен кунев, кванца живго кунев.

· Жинцаго цIуничIеб къадру чияца цIунулареб.

· Жинцагоги гьабулев, жиндиегоги гьабулев.

· Жинцагоги кунареб, кунелъеги биччалареб.

· Инсул сагIадат бихьун, васасе къимат кьоге.

· Инсуда малъаруге, гьес малъараб гьабе.

· Инсуе йокьун, васасе ячарайила, эбелалъе вокьун, яс кьурайила.

· Инсуеги лъимал жиндиего жо кьолел рокьулел.

· Инсуца хер бичани, васас хур бичулеб.

· Инсуца соно квани, лъималазул цаби секколел.

· ИнчIевани лъаргIиве, лъачIевани Магьдида.

· ИнчIого къоги беццуге, вихьичIого чиги веццуге.

· ИнчIого хаселги беццуге, хвечIого нуцалчиги веццуге.

· ИнчIого, хвечIого чиясул къимат лъаларебила.

· Ирсалъе щвараб гъамас цIураб меседалдаса васасул кверзул махщел бергьунебила.

· Исана сон савуд хварабгIаги.

· Исхъалидул чухъида хъабарча бащалъиларо.

· Итни къо къоялгун шагьадулеб.

· Их бащалъизегIан божи бугеб хур тоге.

· Их лъамалъичIони, лъидир бакъвалъулареб.

· Ихдал гьури – гьанал барти.

· Ихдал нилъеца къолеб, хаслихъе нилъее кьолеб.

· Ихдал хур рехун тоге, хасало рукъ рехун тоге.

· Ихдал хурибе бачIони, хаслихъе цогъронибе балареб.

· Кванай вакьидал, рокьи гIолохъанго гьабе.

· Кванай кьарияв, хIалтIи хIалакъав.

· Кваналаго кIалдиб къачIони, къулчIулаго щокъроб къалеб.

· Кваналареб хIамица ХIоцомегIер бегулареб.

· Кваналарищан абураб жо – кванагеян абураб жо, гьекъеларищан абураб жо – гьекъогеян абураб жо.

· Кваналел ратани, кванай, хIалтIулел ратани, хIалтIе.

· Кваналел таги, гьекьолел таги, тIасан рорчIугеги.

· Кваналареб баси басандулареб.

· Кванан бахъарабдай, нахъе тарабдай?

· Кванан рахьараб мехалъ, рукъ чиярлъулеб.

· Кванан гIорцIуларев чIикIунги гIорцIиларо.

· Кванараб хIарччинибе хIацIу туге.

· КваначIого, гьекъечIого вакъизеги вукIунге; гIемер кванан, гIемер гьекъон, къаличехьги гьабуге.

· КваначIого хIалтIани, черх нахъе кколеб, хIалтIичIого кванани, рукъ нахъе кколеб.

· КваначIого хIалтIуге, хIалтIичIого кванаге.

· Кванда квешабилан абизе бегьуларебила.

· Кванил тIагIам хварасе харбил кеп букIунареб. Кванда чIухIуларев хIалтIудаги чIухIуларев.

· Квине кIолареб бечелъиялдасаги цIунаги, росасда кьили лъурай лъадиялдасаги цIунаги.

· КвинчIеб жоялъул баркала букIунареб.

· КвинчIониги, гьан кьарияб лъикI, кьечIониги, мадугьал бечедав лъикI.

· КенчIероялъ цIа бакун, цIеца мун хинлъиларо.

· Кепкил къимат гьабуларес гъурщилги гьабулареб.

· Кето гьечIеб гьороб хашгьи кIудагIонкIкIоца гьабула.

· Кето рихаразда гIункIкIаз къвал балеб.

· Кето хIалакъасеги хIама кьариясеги яс кьоге.

· КечI берцинлъизе – бакъан, риба хIалаллъизе – хIилла.

· Кибалиго аздагьо къинлъун рагIулила.

· Кибе аниги, хIамие – хIалтIи, хIамибокьове аниги, нуцалчиясе – бертин.

· Кибе гъугъарабги – Гъуниб магIарде.

· Кибе ун букIараб гьитIинаб? КIудияб балагьизейищ?

· Кибе цер аниги – хадуб рачI, киве хан аниги – хадуб нагIана.

· КIалъалареб кIал букIунареб, бакъвалареб ракI букIунареб.

· КIалъалев чи – гьурщулев, гIенеккарав – бищулев.

· КIанцIани бох бекулеб борхалъуде вахунге.

· КIанцIараб гьой лъаларев, къинлъараб гважи лъаларев.

· КIанцIулаго чахъдал цIолъи бихьараб цIцIе белъарабила.

· КIанцIун вахъунареб бакIалда гIужги багейила, батулареб рагIиги бицунгейила.

· КIартида аскIоб бухьани, бечеги кьазе ругьунлъулеб.

· КIарчамаб кьегIер кIиго чахъдада хахулеб.

· КIарчанлъигун кIухIаллъиялъ кIиго лъимер гьабунила, мискинлъиян, хIакъирлъиян цIарал гьездаги лъунила.

· КIвахI месед гуро, хIалхьи гIарац гуро.

· КIвахI – сахлъиялъул тушман, хIалтIи – сахлъиялъул гьудул.

· КIвахIал вегун хIалтIулевила, кIусун кьижулевила.

· КIвахIал – кидаго унтарав,

· КIвахIалаб хIамица ХIоцомегIер бегуларо.

· КIвахIаласе чияр хIалтIи бокьулебила.

· КIвахIалда гъулач бугев, хIалтIуда цедер бугев.

· КIвахIалъ вас гьавуларев.

· КIвахIалъ лъим гьекъолеб батани, хIалтIиялъ гьоцIо гьекъолеб.

· КIицIул кIанцIун, кIкIал бахунареб.

· КIицIул ургъе, цин абе (анкьцIул борце, цин къотIе).

· КIицIул чи холарев, pyxI цин гурони бахъулареб.

· КIиябго бер бецас цояб бер бецасда «Бецук! Бецук!» – илан абурабила.

· КIиябго бералда чияр лъимал рихьараб мехалъ, цояб бералданиги нилъерго лъималги рихьизе кколел.

· КIиябго бералъул данде ккечIогойила гьоркьоб мегIер бижараб.

· КIиябго квер кодобе кьурасда божуге.

· КIияздаго гIайиб гьечIого, кIиго чи къацандуларо.

· КIкIалахъ лъим камулареб, рохьоб чан камулареб.

· КIкIараялдаги букIунебила жиндаго рекъараб pyxI.

· КIкIараялдеги хвалчен бахъарав.

· КIкIуй гьечIеб цIа букIунареб.

· КIкIуялдаса цIунизейилан цIадаве лъугьунге.

· КIодолъиялде вахине бокьарас гьитIинавги кIодо гьавула.

· КIудияб бакI кквезе ккани, кIудияб гIакълуги къваригIунеб.

· КIудияб вагIзаялдаса гьитIинаб мисалалъул пайда цIикIкIараб.

· Лал тIамизе бегьулареб къоялъ къед гьабизеги бегьулареб.

· Лачен – чанабе, гъеду – рохьобе.

· Лаченги Тарулеб, тайлан хъущтIулеб, тувадахъ гурони гIодоб кколареб.

· Лаченги чучула, чи гIемерлъани чаранги биуна, ЦIа гьалаглъани.

· Ле гIакълугьечI, тIуруге, гIи тун гIангис кинигин, ГIадамал тун хьвадани, хьитал хун, басралъулин.

· ЛъабцIул къинлъичIого, гIака лъалареб.

· ЛъабцIул рагIа-ракьан бухъичIого, хур бачIунареб.

· Лъавукълъи букIуна гIакълулъун хIалеб, жагьиллъи бахъуна жибги гIелмуян.

· Лъадал берищ, рокьол гIусищ?

· Лъадал къатIраялъги гамачI борлъулеб, цIадул хIенехIалъги дунял бухIулеб.

· Лъадацаги жиндиего нух бахъула.

· Лъади гьечIев росги рос гьечIей чIужуги – чIобогояб рукъ.

· Лъади квешасул гIумру гIазабалда гирула.

· Лъади лъикIав лъикI вуго, лъади квешав квеш вуго.

· Магжида нус бабадулеб рекIинчIеб мехалъ, кIалдиб мацI кIичIардулеб гьереси бицунеб мехалъ.

· Магжилъ иман букIунареб, рекIелъ гурони.

· Магъал гьанахъ гьоэр щолареб (нилъее къваригIараб къоялъ лъикIалъухъги квешаб щолареб).

· Магъил ургъел гьабулагойила хIанчIил бохдул тIеренлъарал.

· Магъилъ ругел хурзабазги хабалъ ругел умумузул рукьбузги гьабизе жо гьечIо – xIapa хIажат буго.

· Магъихъ балагьун, кьурде, цер.

· Магьихъ ралагьуге, гьакихъ ралагье.

· Магь цIезе ссан гурел, caxI цIезе хур гурел.

· МагIарда бартуцаги лъикIабаб кколебила.

· МагIарда гIи бугев – гIaг гьечIеб шарбал,

· ГIиялъ куйдул ругев – тIох гьечIеб тIагъур.

· МагIарда чан букIаго, чурун хьаг цIеда лъоге.

· МагIардаги гIундул ругел, гIалхудаги берал ругел.

· МагIарде ваханиги, гьитIинав кIодолъуларевила, гвандиниве реханиги, кIудияв гьитIинлъуларевила.

· МагIарде гъуниги, хIамица заз гурони кунареб.

· МагIарде гIазу баги, гIухьби рокъой рачIине, ГIурдаде саву ккаги, вокьулесда бер чIвазе.

· МагIарде гIазу бани, гIурухъе цIорой кколеб.

· МагIарзухъа кIалдибегIан къокъаб жойила гьереси.

· «МагIарзухъан бачIаги!» – ян, чед кьун, вохизавуге дун; гьумер битIун кIалъараб кIалалъ вохизаве дун.

· Мун кьижун вукIунев, дур тушман кьижуларев.

· Мунагьго гьечIей яс ялагьулаго, чIужуго щвечIого, хутIаравила.

· Мунги – хан, дунги – хан, хIама лъица гьекъелеб, хуриве щив инев?

· Мунилан холев дун, дун хабалалъе восагиян мун. Мунго дудаго лъачIого, чияде рагIи абуге.

· Мунго дуцаго!

· Мунго дуцагоги веццуге, гьечIеб гьунаралдасаги чIухIуге.

· Мунго гьалаг гьавулеб гьаваялда рекIунге.

· Наиб аралъусан нукарги ине кколевила.

· Найица тIегь кванала,

· Наккдалъ бахчун, варани тIубаларо.

· Наккдалъ каржин къинлъарабила, харилъ борохь къинлъарабила.

· Накку гьечIеб гьороре къадакаби унаро, гIатI-тIех гьечIеб къвачIиде гIункIкIаз къасд гьабуларо.

· Нилъерал чияда лъалел, чиярал нилъеда лъалел.

· Нилъералго чинква гьарун, чиярал цIулакьо гьарун, хьвадугейила.

· Нилъерго бакI – алжан, чияр бакI – жужахI.

· Нилъерго васасул вас лъугьинчIони, нусалъулги яс лъугьунарей.

· Нилъерго вугониги, чияр анищан ккаравги вукIуневила чи.

· Нилъерго гъосодасанила нилъго хъущтIулел.

· Нилъерго квенги кванан, нилъерго ретIелги ретIун, чияр ургъалида рукIунгейила.

· Нилъерго лаченалъул чияр бакIалдаса бачIараб гьадилгIан къимат гьабуларебила.

· Нилъерго лъараца чияр гIурул хъуй рагIизе толаребила (Нилъерго лъарал гьаракь бугони, чияр гIурул гьаракь рагIулареб).

· Нилъерго лъималги цере тун, чияразда малъаруларел.

· Нилъерго малъаз гIадин нилъер мугъ хъасулареб.

· Нилъерго рукъ гIадаб бакI гьечIеб, хъизамалде гIадаб рекIелгъей букIунареб.

· Нилъерго реццалъ гIадин, чияр реццалъ нилъее зарал гьабуларебила.

· Нилъерго хъорщода чиниги тун, чияр горда бугеб щагIида бахиллъуге.

· Нилъерго хьитинибе ккечIеб цIаялъ хIетIе бухIуларо. Нилъерго хIал нилъеда лъала, чияр хIал чияда лъала.

· Оц гIураб мехалъ, гIинтIизеги ккогеги, гIолохъанчи гIураб мехалъ, гIакълу малъизеги ккогеги.

· Оц кьун, барщизарула, хIелеко кьун, рекъезаруларо (Шагьи кьун, барщизаруге, оц кьун, рекъезаре).

· Оц кьурул рагIалде къайгун, хIамида ургъел чIвалеб.

· Оц кIанцIизе кватIани, гIака кIанцIулеб.

· Оц льугьунеб жо бачидаго лъалебила.

· Оц лъугьунеб жоялъул лълъар бегIераб букIуна.

· Оц мацI лъалес бикьун батаги.

· Оц тIураниги, Марьямил гIайиб, релълъ беканиги Марьямил гIайиб (Оц тIураниги – Марьям, релълъ беканиги – Марьям).

· Оц хвани – гьан, гьоко хвани – цIул.

· Оц хваниги, хур хутIулеб, хур хваниги, ракь хутIулеб.

· Оцаз гьабураб чоца, рииялъ гьабураб хаселалъ кваналебила.

· Оцал тIуричIони, тIегь балареб, гIаде ракь хъвачIони, хур бачIунареб.

· Пакъирзаби, мискинал бечедал чагIи!

· Палугьан гурони, квариде вахунаро.

· Панкъ гьабизе лъим щвечIей,

· Лъелъе базе цIан щвечIей.

· Панкъил къулгьу, къолол бертин.

· ПасихIал рагIабаца богIол цагъур цIеларо.

· Пахьул бетIералда жанир меседил пикраби рукIунарел.

· Пашманасул магIу гIемераб, рокьи ккарасул хабар гIемераб.

· Пашманлъи гьоркьоб гьечIеб рохелги букIунаребила, рохел лъалареб пашманлъиги бачIунаребила.

· Пер кунарес хъал кунеб.

· Печрокъор гьарурал хIукмабаз я ахикь пихъ бижуларо, я хуриб тIор баларо.

· Пикраби – магIарда, къварилъи – мугъзада нахъа.

· Пикру гIемерлъани, чи гIадаллъулев.

· Пикру – цебе, ццин – хадуб.

· ПиргIавние Муса камуларев.

· Пири пирханщинахъе зоб гъугъалареб.

· Пириялъеги гъветI кIудияб бокьулеб.

· Питна бокьарас багьана, ракь хъвалхьун, балагьулеб.

· Питнабазул мугьал хьани, балагьазул гьирал раччулел.

· Питнадул мугьал хьани, балагьалъул тIор бала.

· Пихъ бижулареб гъветI гьурщулареб.

· Пихъ гьечIеб гъотIода тIил речIчIулареб, лъим гьечIеб иццухъе гел бегьулареб.

· Риидал черх берцин гьабула узданаб ретIелалъ, хасало хинаб ретIелалъ.

· Риидал чIарадичIони, хасало гьороб жо букIунареб.

· Риидала – Хасбика, хасало – къватIулбика.

· Риидалил цого хур, хасало гIазукь къараб,

· Хасалил цого сугъур, бохисан хер баккараб.

· Рии-риидал – чIорр-чIорол, хаса-хасало – гуд-гудуч!.

· Рикьи балеб къвачIинибе къали базе бегьуларо (рикьунибе къали чIехьолареб).

· Рикьул гьарурал хинкIал ригьда кунев алазан.

· РикIкIада бугеб гIагарлъиялдаса аскIов вугев мадугьалго лъикIила.

· РикIкIада ругел гIагарал чагIи, унтун рагIилалде, хун ратула, хун рагIилалде, рукъун рагIула.

· РикIкIадаса квараб къалиялдаса гIагардаса квараб сахI лъикIаб.

· РикIкIадасан йихьизе лъикIай чияр яс аскIоре щун йихьизе жо гурей жо ятула.

· Рокъоб къадру гьечIесул къватIибги букIунареб.

· Рокъоб къвакъвадулеб, къватIиб къинлъулеб.

· Рокъоб къир-къир бугони, дуниял къварилъула.

· Рокъоб кьечIеб талихI рохьоб кьелищилан абурабила салтIаселъ.

· Рокъоб ххан бугони, халатаб гурде, ххараб жо бугони, чIахIиял хинкIал.

· Рокъоб чед бугесда чияр мацI лъаларо.

· Рокъобго къулгIаги тун, къватIиса лъим баччарай.

· Рокъобе нух кидаго гIагараб.

· Рокъов гъалбацI – къватIив гIанкI.

· Рокъов – дегIен, къватIив – цIцIе.

· Рокъов цIогьор хваги, ЦIоров дибир хваги.

· Рокъой йигеб мехалъ инсул рукъ, рокъое юссиндал – чияр рукъ.

· Росулъе унти я базарганасул гьирица бачIунеб, я гьардохъанасул къвачIица бачIунеб.

· Росулъе щвезе рес букIаго, къватIивги чIоге, росу рикIкIад букIин лъалаго, къаси нухдаги вахъунге.

· Рохел гIемералъур кьурдухъаби рахъунел, хвел гIемералъур магIихъаби рахъунел.

· Рохол багьа къого гъурущ.

· Рохъдол чед гьабурай, чияр чи веэдарай.

· Рохьалъ тала босичIого толаро.

· Рохьдолъ букIунареб чIухIухъаналде чIалгIараб салам дир махил тIилалъул!

· Рохьдолъ чIа, рохьдолъ хва.

· Рохьдолъ чIолареб хIайваналда тIил щола.

· Рохьил хIайван рохьоб гурони чIоларо.

· Рохьоб гъотIодаги кидаго цого хIал букIунаребила.

· Рохьоб хьараб хьодул пайда щибила.

· Рохьоб цидаги данде чIвагеги кIиго эбелцадахъ.

· Рохьоб циги хутIугеги, цого тIинчIалда божун.

· Рохьоб чан камулареб, чорхолъ унти камулареб.

· Сабру гьаби гIоларо, рекIелъ гIакълу гьечIони.

· Сабру гьабурасе пайда кIудияб.

· Сабру гьечIев чиясул гьабун жо белълъунаро.

· Сабру – гIакълуялъул хан.

· Сабру тIагIарасухъа гIад гьабун жо босуге.

· Сабру цебе ккезабе, ццин нахъе ккезабе.

· Сабруялда чIарасе пайда камулареб, хехдарухъанасул хиялал xIopгo хутIулел.

· Сабруялъ мегIер лъухъалеб.

· Сабруялъул тIиналда – багIараб месед.

· Сабуралъул ахада – рохел.

· ТалихI бугев чиясул чухъил къвал хIулиларо.

· ТалихI бугезда ккеларо бицун гIадан божулареб, гIодун Аллагь гурхIулареб гьуразул унти.

· ТалихI бугесул бихьинхIамаги къинлъулебила.

· ТалихI бугесул гвай къацандулеб.

· ТалихI бугесул оц ияхI бугесухъе ккела.

· ТалихI бугесул хIама хIортIа къинлъулебила.

· ТалихI, гьакил милъир гIадин, сверулеб: цин тIаде кколеб, цин гъоркье кколеб.

· ТалихI гIодобе бортун батулареб, чIобого кьолеб жо букIунареб.

· ТалихI духъан бугони, гIадамалги духъан рукIунел, дур талихI къосани, гIадамазда мунги къосунев.

· ТалихI, кибе бахъараб?

Гьудуллъи бугелъубе.

· ТуманкI гьечIев чанахъан, чухъа гьечIев багьадур.

· ТуманкI лъикIаб – халкъаль цIураб, рагIи лъикIаб – киназулго данде ккараб.

· Тури гьекъон, къеч хьвалареб, дуниял кваниги, къарум гIорцIуларев.

· Туркидул кири гьечIеб, кочIол хIакъ гьечIеб.

· ТуркIе, дадал Гъазали!

· Тухум лъикIай дуего те, жийго лъикIай дие кье.

· Тушманзабаздаса дицаго цIунила, Аллагь; гьудулзабаздаса дуца цIуне.

· Тушман вукIа абе, гьобол басра гьавуге.

· Тушман гьавизе бокьани, къарзалъ гIарац кьейила.

· Тушман гьекъезаве, гьудул кваназаве.

· ТIад рекIараб чол квелъ кквезеги лъазе кколебила. ТIадаб гуреб гьабуни, гьабизе кколеб бегулеб. ТIадагьаб чвантидаса бакIаб гьир гьечIеб.

· ТIадго арав гьоболги лъикIго кьолеб микьирги.

· ТIадго кквечIев цIогьор гурев.

· ТIаде валагьарасе – рахьу, бухъулесе – хъиру.

· ТIаде гьобол къотIугеги, гьабихъе нух къосунгеги.

· ТIаде къо ккани, къоркъолги бацI лъугьунеб.

· ТIаде къо ккезегIан кIалалъ гьури кколарес, тIаде къо ккараб мехалъ, горбода бетIер кколареб.

· ТIаде лъим бачIунареб xIop хеккого къунеб.

· ТIаде хъвачIого, ракьалдаса чиясул хIал хьоларебила.

· ТIаде цоги гъеду бачIани, гъоркь букIараб боржунеб гIадат.

· ТIаде цIанагIан гIемерлъулебги ургъел, тIаса бачахъанагIан дагьлъун унебги ургъел.

· ТIаде чи лъаларила, чараб гьой лъаларила (гьабулеб ишалъе хехлъи гьабейила...).

· ТIаргъил борхалъиялъ гуребила чиясул тIадегIанлъи борцунеб.

· ТIарцIаб куялдаса керчаб гьой лъикIаб.

· TIaca лъугьа! Дур букIин лъарабани, бикъилароан!

BaxI, дир букIинни лъан батиларин, дурго гуреблъигIагийищ лъачIеб?

· ТIасан бараб рукъи тIасан холеб.

· ТIахьал гIабдалзабазе гурелила хъвалел.

· ТIегь балареб гъотIоде наялги руссунарел.

· ТIегь гIемералдаса гъветI тIамах гIемераб лъикIаб. ТIегь гIурдада берцинаб.

· ТIегьги херги бижилалде, лъимги ракги бижарабила.

· ТIегьалареб гъотIода пихъ бижулареб.

· ТIекъав, тIикъвамагIал чIваниги, хъущтIулев.

· ТIекъалда тIад рекъоге, къурасде вортанхъуге.

· ТIекълъи ккедал абула илбисалъ батилилан, амма кици букIуна мунго дуцагойилан.

· ТIелекье ГIалибулат гIадин.

· Унтун халалъугеги, херльун басралъугеги (Халатаб чIвагеги, чIамучIаб ккогеги).

· Ургъалида тIаде тIенкелгIанай ясги гьаюнила.

· Ургъалица черх чIварабила, чоца гьор кварабила.

· Ургъел бегьуларев, багьа кьун, восуларев.

· Ургъел бикьуларев вокьулев хваги,

Рокьул бицунарей йокьулей хваги.

· Ургъел гуребаб ургъеллъугеги, рухIел гуребаб рухIеллъугеги.

· Ургъел гьечIеб жо ракIалда чIолареб.

· Ургъел гьечIеб жоялъе шакдари дагьаб.

· Ургъел гьечIев чи ватичIев, чехь бухIичIеб черх батичIеб.

· Ургъел гьечIесул гIумру халатаб, хIалтIи бокьуларесул гьанта халатаб.

· Ургъел гьечIесул макьу щулияб.

· Ургьибе ккараб жоялде саву кколареб.

· Ургьибеги лъугьунеб, нахъеги бачIунеб борохь.

· Урхъукье вачIа, дадал!

· Устар лъала, къайи бихьун.

· Устарасда релълъараб букIуна хIалтIиги.

· Устарасул къед квешаб, къебедасул нус квешаб.

· Устарасул хьит гьечIеб, къебедасул нус гьечIеб.

· Устарасул роц-роцго устарабила.

· Устарасул хIатIалги устарал.

· Устарги вукIуна, хIургIаустарги вукIуна.

· Халкъалъул тушман – къацандухъан.

· Хамиз сордо кинаб магIидаян абурабила сордо цIарай ясалъ.

· Хамил базарган, мусру гьечIого, вукъаравила.

· Хан нилъер гьобол гуро.

· Хан хведал вецце, лъимал гIедал рецце.

· Хан хола, лагъги хола – кIиялго бащалъула.

· Ханазда тIад кIусараб гIанкIу гIадин.

· Ханас кьураб чол кIалдире раккуларел.

· Ханас цIияб чухъа ретIани, баркулебила, мискинчияс ретIани, гьаб киса щварабилан гьикъулебила.

· Ханасда аскIоб кIиго ламадур квани, цояб магIарзухъан бачIунебила.

· Ханасде лъикIав чиян абе, хабада хух-бурутI гIорцIизе хер бижараб мехалъ.

· Ханасда нич гьечIеб, гьарчида бер гьечIеб.

· Ханасда цевесанги чода нахъасанги вилълъунге.

· Хвалчада гурхIел гьечIеб, гуллида берал гьечIел.

· Хвалчада нахъа гьелда рекъараб гъежги къваригIунебила.

· Хвалчадаса бергьарабги – хIилла, тункIидаса гIужилабги – хIилла.

· Херлъунилан бацIил цер лъугьинаро, цаби гъунилан ритIучIил багьа хвеларо.

· Херлъунилан бацIица бацIил гIамал толареб.

· Херлъунилан оцолги гIалимчиясулги багьа холареб.

· Хехаб гважуца беццаб когIо гьабулебила.

· Хехаб гIop ралъдахъе щоларебила.

· Хехаб цIад хехго къотIулеб.

· Хехго бачIунеб, кватIун унеб жойила къварилъи.

· Хехго гIуцIараб хехго биххулебила.

· Хехго рекIараб цIа хекко сунеб.

· Хехдари гIайиб буго, гIодов виччай рецц буго.

· Хехлъуге, мутагIилум, хехлъуге! Дуе яси щвана, дие кваси щвана.

· ХинкI босарас тIор босе.

· ХинкIазде – щвартIихалат, хуриве – рагIадхалат.

· ХIайван – тIасан чараб, гIадан – жанисан чарав.

· ХIайван хвани – ракьа, чи хвани – ишал.

· ХIайван хIайваналда релълъараб, гIадан гIадамасда рельлъарав.

· ХIайваналда ччехI ккани, риидал кьаралъула, рукъалда ччехI кканани, чанги сон къваригIуна.

· ХIажалъиялъ малъула, магъалоялъ квегъула.

· ХIажат гьечIеб хабаралда хадувги лъугьунге, кколареб ишги бетIералде босуге.

· ХIажизабазулги рещтIунгегийила бо.

· ХIажигIисал хъулухъ.

· ХIажиясул ракI ХIавал кIалдиб.

· ХIайваналцин рагъизе тIами Аллагьас гьукъараб жойила.

· ХIакимасда цевесанги унге, хIамида нахъасанги унге.

· ХIакимзаби рихьидал, «рорчIами!» – ян вортулев, цогидазда бер чIвайдал, рихьичIеб ххвел гьабулев.

· ХIакимасул витIи – чи ватIа гьавунгутIи.

· ХIалтIичIони, хIалтIи букIунаро.

· ХIалтIичIони, чIамулареб, чIамичIогоги гIолареб.

· ХIалтIуда махсара лъалареб, махсараялъ квен кьолареб.

· ХIалтIуда рекъарабила мухьги букIунеб.

· ХIалтIудаса хIинкъуларесдаса хIалтIи хIинкъулебила.

· ХIалтIуде унелъул цевехъан – мискинчи; берталъе унелъул цевехъан – бечедав чи.

· ХIалтIуе – квалквад, квание – гъалбацI

· ХIалтIуе – кечI, кинидае – лаилагьа.

· ХIалтIуе – пахъла, квание – хъанхъра.

· ХIалтIуде – хьадар, квание – гIедер.

· ХIалтIул лъикIлъи лъугIидал лъала, чиясул лъикIлъи хведал лъала.

· ХIалтIул пайда гьечIеб, пикру гьечIони.

· ХIалтIул рагIал тIерен ккурав, тIабкIил рагIал бицат ккурав.

· Цо гIилла гьечIого, гIадан мискинлъуларо.

· Цо гIилла гьечIого, нухда мохмох лъоларилан абурабила цараца.

· Цо гIилла гьечIого, цIад балареб, цо гIилла гьечIого, бакъ щолареб.

· Цо гIиялъажо хъунги, бертин гьабейила, цIалкIу кIутIунги, берталъ рохел загьир гьабейила.

· Цо гIункIкI царгъикь гьабулебила, цо гIункIкI авлахъалда гьабулебила.

· Цо жо бикъарас кинабго бикъарабиланги кколеб, цо гьереси бихьарасул кинабго гьересиянги кколеб.

· Цо жо ракIалда гьечIого, гьедигIан гьитIинаб хIалтIухъ гьедигIан кIудияб мухь кьеларин дуцаян абурабила бакьучалъ бацIида.

· Цо росулъ цо гIабдал гIун вугилан абурабила ХIажихIума-дибирас.

· Цо-цониги гIайиб ханасул ясалдаги кколебила.

· Цо-цониги гIакъилаб жо гIабдаласги бицунеб.

· Цо-цониги гIакъилги мекъи кколевила.

· Цо-цониги оцол багьаябги букIунебила гьереси.

· ЦоцIул бицани – берцинаб, кIицIул бицани – мухьучIаб.

· ЦоцIул кIодолъулевила чи, кIицIул гьитIинлъулевила.

· ЦIадаб бачIеб чед кунев Бигищ гIадин.

· ЦIадабе бегьараб квер бухIичIого хутIуларо.

· ЦIадабе нарт тIолареб.

· ЦIадакьаги ворчIун, гонгикье ккана.

· ЦIадакьаги лъутун, гонгикь чIарав.

· ЦIадал барти – буртина, гьорол къолден – къехь.

· ЦIадал къалиялдаса бакъул caxI бергьунеб.

· ЦIадал кьоялъе бакъул къо камулареб, лабалда хуралъе цIадал къо камулареб.

· ЦIадал сон бакъараб, бакъул сон гIорцIараб.

· ЦIадалаб сон харилаб, бакъулаб сон хурулаб.

· ЦIадалабги гьекъана, бакъулабги къулчIана.

· ЦIадулгун махсара те, лъадалгун божилъи те.

· ЦIал кьун гIоларесе, чу кьуниги, гIолареб.

· ЦIалани, гIелму щолеб, хIалтIани, боцIи щолеб.

· ЦIаланщинав чи Къудукьа Мусалав вукIунарев, кьалде анщинав ХIажимурад вукIунарев.

· ЦIаланщинав чиясул гIалимчи вахъунарев: цо-цо гIалимчиги вукIунев, цо-цо цIалунчиги вукIунев, хутIарал чIинкIилалги рукIунел.

· ЦIалараб гIоларебила, цIалкIизеги кколебила.

· ЦIаларасда гIелму лъала, бихьарасда дунял лъала.

· ЦIалаца бухугейила жиб, кIалцIуца бухеян абулебила чоца.

· ЦIалдохъан лъикIав вугилан, мекъса кьураб жавабалъе лъикIаб къимат лъолареб.

· ЦIалкIал рекьарулел, гьаркьал лъилъарулел.

· ЦIогьор бечельуларевила, бахил кьаралъуларевила.

· ЦIогьор гьедула, хъахIба гIодула.

· ЦIогьор гIорцIуларев, гIалим вакъуларев.

· ЦIогьор жиндирго рагIадалъукьаги хIинкьулев.

· ЦIогьор гIаргьил щомериялдасанги ватIа гьавизе лъалевила.

· ЦIогьорасул берал мугъалда нахъаги рукIунелила.

· ЦIогьорас гурони, цIогьор веццуларев.

· ЦIогьорас жиндирго каву щула гьабулеб.

· Чаргъеду пархунилан, бакъул нур свинаро.

· Чарухъаз гьабун, чакмабаз кваналеб заман бачIун буго.

· Чахъаби ругони, вехь камиларо.

· Чахъаби чвантинир лъикI.

· Чахъабиги цIунун, бацIалги гIорцIун.

· Чахъдал къинлъиялдаса куйдул багьлъи бергьунеб.

· Чахъдал тIом ретIараб чакъал гIемераб.

· Чахъдал цIолъи бихьидал, цIцIе белъарабила.

· Чахъдаца цIараб цIцIеде бачунге.

· Чахъу гIорцIулареб, гIорцIен къинлъулареб.

· Чахъу чIваниги, багIарабила бацIил кIал, чIвачIониги багIарабила.

· Чахьалда къоноги лъун, мукъратIа гьецIоги лъун, щай чIоларев, бихьинчи, жадул лълъар гьекъезегIан.

· Чванта тIадагьлъани, гьудулзаби дагьлъулел.

· Чвангида кIулал рарав.

· Чвантиниб гIарац бугони, магIардаги ах гьабулеб.

· Чвантиниб гIарац бугони, эбелалъул къвалакьа яхъунги, яс кьолейила.

· Чвантиниб гIарац гьечIого, базаралде инегIан, гIаштIи кодоб гьечIого, рохьове инго лъикIаб.

· Чияда цебе хъат кквеялдаса хъирул къоно тIад байго льикIаб.

· Чияда цебе хъат ккурас черх бичула, чияе наку чIварас намус бичула.

· Чияда – цедер, дудаго – рокьо.

· Чиядаса тIокIлъарасул тушман гIемер вукIуна, бажари-гьунар бугев хашазе тушманлъула.

· Чияде абулелъул, дурго эбелалъулги пикру гьабе.

· Чияде хьамураб жиндего буссунеб, чияде абураб жиндего бачIунеб.

· Чияе бухъаралъуре нилъго кколел.

· Чияе гьабураб кумек – дуего гьабураб кумек.

· Чияе гьереси бицарас дуеги бицунеб, чияе хиянат гьабурас дуеги гьабулеб.

· ЧIагого хун вачIинегIан, хвечIого ракьулъ вукъиго лъикI.

· ЧIагоязе гьимуларев, хваразухъ гIодуларев.

· ЧIагоязул пикру гьабуни, хваралъ вуго, хваразул пикру гьабуни, Багъдадалда вуго.

· ЧIагоял хунилан, хварал рахъунарел.

· ЧIужу ячарай гIолареб, чIужуялъе росги къваригIунев, руссунги къваригIунеб.

· ЧIужу яче, чияе инчIей, чу босе, чияца рекIинчIеб.

· ЧIужу ячин – моцIил рохел, гIумруялъул ургъел.

· ЧIужу ячине – херав, хвезе – бахIарав.

· ЧIужу ячунге, чадил мучари гьабулей.

· ЧIужу ячунелъулги чу босулелъулги, бералги къанщун, Аллагьасде божилъи гьабе.

· ЧIужуги йикIуна, чIужукIги йикIуна, щагIил рекелги йикIуна.

· ЧIужугун вагъани, чехь тIеренлъула, росугун вагъани, рукъ нахъе ккола.

· ЧIужугIадан йигила цIорол тIагIел, чIинкъани рукъи базе бегьулареб.

· ЧIужугIаданалдаса къадарав бихьинчиги вукIунев, бихьинчиясдаса цIакъай чIужугIаданги ятулей.

· ЧIужугIаданалъул гIакълу квенчIелтIа букIунебила, гьей тIаде яхъингун, бортунги унебила.

· ЧIужугIаданалъухъ ралагьизейила берал рижун ругел.

· ЧIужуквешил гьобол вохун унарев.

· ЧIухIи бичун босизе кколареб.

· ЧIухIуге: чIегIераб ракьалдайин мун лъезе вугев. ЧIухIи хIатIикье кколеб, бахIарчилъи тIад кколеб. ЧIухIиялъги вакъиялъгийила КъурбангIали хварав.

· Шагь гIадаллъун ватани, Дагъистаналъул халкъалда данде рагъде виччай.

· Шагьи гуронани, гIарацги щвечIев, цо гIанкIу гурони, боцIиги гьечIев.

· Шагьи кьун, барщизаруге, оц кьун, рекъезаре.

· Шагьиялда барахщарас гъурущ бичизе кколеб.

· ШантIулида бадибе чугIанги валагьичIила.

· Шиша бугев – гьудул, гьан бугев – даци.

· ЩагIил рекелалда чIулгIи бекуге.

· ЩагIица берал сурай, суркIица кIал бахъарай.

· Щай нилъедего кколареб хIал гIи бегIералде босизеян абурабила гъадица хIамида.

· Эмен гьечIесдаса эбел гьечIев цIикIкIун бесдалавила.

· Эмен гьечIесул кIудияв эмен валагьуге.

· Эмен гьобол гIадав чи; рукъалъул хIал эбелалда лъикI лъала.

· Эмен къолохъан вугони, вас кьурдухъан вахъуневила.

· Эмен къваригIунареб къо бачIунареб.

· Эмен лъикIасдаса живго лъикIав лъикI, эбел лъикIалдаса яс лъикIай лъикI.

· Эмен рихарав васасда живгоги рихунев.

· Эмен хвеларев щив, оц хъвеларев щив! (дуца диеги гьабичIо, дица дуеги гьабиларо).

· Эмен цин кваналев, эбел кIицIул кваналей, лъимал лъабцIул кваналел.

· «Юргъа бачани, бетIергьанчихвад, мун чияца рекIуна».

· Юргъаялъ – чу, ишалъ – чи.

· Я гьанив гурев, я дова гурев.

· Я гIарцул чванта цIела, я салул гвангвара цIела.

· Я гIурул рагIал, я мугIрул ракьан.

· Я зурзур те, я квен те.

· Я къали чIвай, я зурма пуй.

· Якьадалъ лъухьизе нусалъ тун, нусалъ лъухьизе якьадалъ тун.

· Я хIама хвела, я хан хвела.

· Я мими гурев, я дуду гурев.

· ЯхIалъ къо рехугеги, къуваталъ некь рехугеги. ЯхIги рухIги – бащадаб жо.

· ЯхI-намус гьечIев нусго бечедасдаса намус бугев цо мискинчиго лъикI.

· Яцалъул ракI – вацгун, вацасул ракI – рохьоб.

· Ячеян дуда гьардезе ккогеги, ячIаян мун гьардезе ккогеги.

· ЯчинегIан «эбелхвад», ячун хадуй «мунгохвад».

· Ячудаса нусалъ вакьадасде дадайилан абулебила, дагьаб хадуб дандамадилан абулебила.

· Ячун щваралдаса ячIун щварай лъикIила.

· Ячунги ячуней лъади, ячIунги ячуней лъади.

· Ячуней мекълъугеги, ячIуней тIекълъугеги.

· ЯчIунелъул – «далалай», дун толелъул – «вабабай».